SCSS Calculator: కేంద్ర ప్రభుత్వం నుంచి అందుబాటులో ఉన్న పొదుపు పథకాల్లో సీనియర్ సిటిజెన్స్ సేవింగ్స్ స్కీమ్ గురించి ప్రధానంగా చెప్పుకోవాలి. సీనియర్ సిటిజెన్లకు ఇది అద్భుతమైన పథకం అని చెప్పొచ్చు. రిటైర్మెంట్ తర్వాత కూడా నెలనెలా ఆదాయం కోసం ఈ స్కీమ్ ఉద్దేశించింది. ఇందులో ఒకసారి పెట్టుబడితో ఐదేళ్ల పాటు ప్రతి నెలా వడ్డీ అందుకోవచ్చు. ఈ పథకం పూర్తి వివరాల గురించి చూద్దాం.
Post Office Small Savings Schemes : మీరు సంపాదించిన డబ్బులో ఏమైనా ఆదా చేస్తున్నారా.. దీనిని ఇతర పెట్టుబడి పథకాల్లో ఇన్వెస్ట్ చేయడం ద్వారా దీర్ఘకాలంలో పెద్ద మొత్తంలో సంపాదిస్తున్నారా.. ఎందులో ఇన్వెస్ట్ చేయాలో తెలియడం లేదా.. అయితే ఇది మీకోసమే. ముఖ్యంగా సీనియర్ సిటిజెన్లకు ఇది గొప్ప అవకాశం. రిటైర్మెంట్ తర్వాత ఆర్థికంగా ఇబ్బందులు లేకుండా ఉండాలంటే.. ఈ పథకం మంచి అవకాశం కల్పిస్తోంది. దీంట్లో ఒక్కసారి పెట్టుబడితో.. నెలనెలా వడ్డీ అందుకోవచ్చు. ఇక్కడ రిస్క్ ఏం ఉండదు. ఇదే కేంద్ర ప్రభుత్వం ఆఫర్ చేస్తున్న ఇండియా పోస్ట్ స్కీమ్.. సీనియర్ సిటిజెన్ సేవింగ్స్ స్కీమ్. ఇతర పథకాల్లో రిస్క్ ఉన్నా.. పోస్టాఫీస్ పథకాల్లో ఎలాంటి రిస్క్ ఉండదు. నిర్దిష్ట పెట్టుబడితో నిర్ణీత కాల పరిమితికి రిటర్న్స్ అందుకోవచ్చు. గ్యారెంటీ రిటర్న్స్ ఉంటాయి. ఈ పథకం గురించి ఇప్పుడు చూద్దాం.
ఉద్యోగం లేని వయసులో.. మలివయసులో కూడా వైద్య ఖర్చులు, ఇతర అవసరాల్ని తీర్చేలా ప్రతి నెలా స్థిర ఆదాయం అందుకోవచ్చు. ఈ స్కీమ్ కోసం బ్యాంకులు లేదా పోస్టాఫీసుల్ని సందర్శించొచ్చు. మీ పెట్టుబడిపై గ్యారెంటీ రిటర్న్స్ ఉంటాయి. ప్రస్తుతం పోస్టాఫీస్ నుంచి అందుబాటులో ఉన్న పొదుపు పథకాల్లో అత్యధిక వడ్డీ రేటు దీంట్లోనే వార్షిక ప్రాతిపదికన 8.20 శాతంగా ఉంది.
దగ్గర్లోని పోస్టాఫీస్ లేదా బ్యాంకుకు వెళ్లి అప్లికేషన్ ఫారం ఫిల్ చేసి మీ కేవైసీ డీటెయిల్స్ ఇవ్వాల్సి ఉంటుంది. లేదా ఆన్‌లైన్‌లో కూడా ఫామ్ డౌన్‌లోడ్ చేసుకొని.. డీటెయిల్స్ ఫిల్ చేసి.. ఫొటోగ్రాఫ్, ఇతర ఆధార్, పాన్ కార్డు, ఏజ్ ప్రూఫ్, అడ్రస్ ప్రూఫ్ వంటివి జత చేసి సమర్పించాల్సి ఉంటుంది. కనీసం రూ. 1000 తో ఇందులో పెట్టుబడి ప్రారంభించొచ్చు. గరిష్టంగా రూ. 30 లక్షలు జమ చేయొచ్చు. ఇక ఈ స్కీమ్ కాలపరిమితి ఐదేళ్లు కాగా.. మెచ్యూరిటీ వరకు పెట్టుబడిపై ప్రతి 3 నెలలకు వడ్డీ మీ అకౌంట్లో జమవుతుంది. కాలపరిమితి పూర్తయ్యాక.. మీ పెట్టుబడి డబ్బులు మీకు తిరిగొస్తాయి. అవసరమైతే.. మీరు మూడేళ్ల చొప్పున ఎన్నిసార్లయినా టెన్యూర్ పొడిగించుకోవచ్చు. ఇందుకోసం మెచ్యూరిటీకి ముందే ఏడాదిలోగా అప్లై చేసుకోవాలి.
అర్హతలు ఇవే..
భారత పౌరుడై ఉండాలి. అకౌంట్ ఓపెన్ చేసే సమయంలో 60 ఏళ్లు ఉండాలి. రిటైర్డ్ ఉద్యోగులకైతే 55 సంవత్సరాలు ఉన్నా చేరొచ్చు. రిటైర్డ్ డిఫెన్స్ సర్వీసెస్ సిబ్బంది 50 ఏళ్లకే చేరొచ్చు. తమ సేవింగ్స్‌ను ఇందులో ఇన్వెస్ట్ చేయడం ద్వారా రిటైర్మెంట్ తర్వాత ఇబ్బందులు లేకుండా జీవించొచ్చన్నమాట.
ఎంత జమ చేస్తే ఎంతొస్తుందో తెలుసుకుందాం. ఇక్కడ గరిష్ట పెట్టుబడి అయిన రూ. 30 లక్షల్ని ఒకేసారి జమ చేస్తే.. 8.20 శాతం వడ్డీ రేటు ప్రకారం.. మెచ్యూరిటీకి రూ. 42,30,000 వస్తాయి. అంటే ఇక్కడ మీ పెట్టుబడి రూ. 30 లక్షలకు అదనంగా.. వడ్డీతోనే రూ. 12,30,000 వస్తుంది. ఇది ప్రతి 3 నెలలకు ఓసారి రూ. 61,500 చొప్పున జమవుతుంది. అంటే నెలకు రూ. 20,500 చొప్పున వచ్చినట్లే.
రూ. 10 లక్షలు జమ చేసినట్లయితే.. వడ్డీతో రూ. 4,10,000 వస్తుంది. ఇక్కడ ప్రతి 3 నెలలకు రూ. 20,500 వస్తుంది. ఇక్కడ నెలకు రూ. 7 వేల వరకు అందుకోవచ్చు. అదే రూ. 5 లక్షలు జమ చేస్తే.. 3 నెలలకు రూ. 10,250 వస్తుంది. మొత్తం వడ్డీతో రూ. 2,05,000 వస్తుంది.
