PPF Interest Rates: కేంద్ర ప్రభుత్వం ఎన్నో రకాల స్కీమ్స్ ఆఫర్ చేస్తోంది. స్టాక్ మార్కెట్లు, మ్యూచువల్ ఫండ్లతో పోలిస్తే వీటిల్లో మంచి రాబడి అందుకోవచ్చు. ప్రభుత్వ గ్యారంటీ కూడా ఉంటుంది. ఆకర్షణీయ స్థాయిలో వడ్డీ రేట్లు ఉంటాయి. అలాంటి ఒక కేంద్ర ప్రభుత్వ స్కీమ్‌లో నెలకు రూ. 5000 చొప్పున పెట్టుబడి పెడితే దీర్ఘకాలంలో రూ. 26 లక్షలు పొందొచ్చు. దీని గురించి చూద్దాం.
Small Savings Schemes : మీరు డబ్బులు పొదుపు చేయాలనుకుంటే ఎన్నో పథకాలు అందుబాటులో ఉన్నాయి. కేంద్ర ప్రభుత్వం దీని కోసం ఎన్నో రకాల స్కీమ్స్ తీసుకొచ్చింది. ఎన్నో పెట్టుబడి పథకాలు ఉన్నప్పటికీ.. ప్రభుత్వ గ్యారంటీ ఉండటం, ఆకర్షణీయ స్థాయిలో వడ్డీ రేట్లు ఉండటం సహా చిన్న మొత్తాల్లో పెట్టుబడులు పెట్టేందుకు అవకాశం ఉన్న ఒక పథకం గురించి మనం మాట్లాడుకుందాం. ఇదే పబ్లిక్ ప్రావిడెంట్ ఫండ్ ( పీపీఎఫ్ ). దీర్ఘకాలంలో దీంట్లో భారీ రిటర్న్స్ అందుకోవచ్చు. ఇక దీని వడ్డీ రేట్లను కేంద్ర ప్రభుత్వం ప్రతి 3 నెలలకు ఓసారి సమీక్షిస్తుంటుంది. ప్రస్తుతం దీంట్లో 7.10 శాతం వడ్డీ రేటు అమల్లో ఉంది. పోస్టాఫీసులు సహా దాదాపు అన్ని బ్యాంకుల్లో పీపీఎఫ్ అకౌంట్ తెరవొచ్చు.
ఇది ఒక పోస్టాఫీస్ పథకం. నెలనెలా మీరు కొంత మొత్తంలో పెట్టుబడులు పెట్టుకుంటూ పోతే చాలు. దీర్ఘకాలంలో అంటే మెచ్యూరిటీకి పెద్ద మొత్తంలో రిటర్న్స్ అందుకోవచ్చు. నెలకు రూ. 1000, రూ. 2 వేలు, రూ .5 వేలు, రూ. 10 వేలు ఇలా ఇన్వెస్ట్‌ చేయొచ్చు. అలా 15 సంవత్సరాల పాటు డిపాజిట్ చేస్తే లక్షల్లో లాభం పొందొచ్చు. ఇంకా.. ఈ వ్యవధిని పెంచుకోవచ్చు కూడా. అప్పుడు ఇంకా ఎక్కువ ఆదాయం పొందొచ్చు. మీ స్థోమతను బట్టి.. ఈ మెచ్యూరిటీ గడువు పొడిగించుకోవడం మంచిది.
ఇక దీంట్లో ఎంత పెట్టుబడి పెడితే రిటర్న్స్ ఎలా ఉంటాయో చూద్దాం. దీంట్లో ఏడాదికి కనీసం రూ. 500 నుంచి డిపాజిట్ చేయొచ్చు. గరిష్టంగా రూ. 1.50 లక్షల వరకు పెట్టుబడి పెట్టొచ్చు. ఈ స్కీం మెచ్యూరిటీ 15 సంవత్సరాలుగా ఉంది. ఆ తర్వాత ఐదేళ్ల చొప్పున పెంచుకోవచ్చు. అంటే 20 సంవత్సరాలు పెట్టుబడి పెట్టారనుకుందాం.
నెలకు రూ. 1000 చొప్పున పీపీఎఫ్ అకౌంట్‌లో డిపాజిట్ చేస్తే.. మీ పెట్టుబడి 20 సంవత్సరాలలో రూ. 2,40,000 అవుతుంది. దీనిపై అదనంగా రూ.2,92,663 వడ్డీ వస్తుంది. ఇక మీ మెచ్యూరిటీ నగదు మొత్తం రూ. 5,32,663 అవుతుంది.
నెలకు రూ. 3000 చొప్పున పెట్టుబడి పెట్టినట్లయితే.. 20 సంవత్సరాలలో మీ పెట్టుబడి రూ. 7,20,000 కాగా.. వడ్డీ రూ. 8,77,989 అవుతుంది. మెచ్యూరిటీ నగదు రూ. 15,97,989 అవుతుంది.
అదే నెలకు రూ. 5 వేల చొప్పున పెట్టుబడి పెడితే.. సంవత్సరానికి రూ. 36 వేలు అవుతుంది. ఇక్కడ 20 ఏళ్లకు మీ మొత్తం ఇన్వెస్ట్‌మెంట్ రూ. 12,00,000 కాగా.. వడ్డీ రూ. 14,63,315 వస్తుంది. మెచ్యూరిటీ మొత్తం రూ. 26,63,315 గా వస్తుంది.
